X
GO
da-DKkl-GL
Utoqqatsissut kimikitsoq

28. novembari 2018: Royal Greenlandip tunisassiorfimmini sulisunik angerlartitsiinnartarnera, illuanillu sulisussaarukkaangami avammut nilliasarnera – allaat Kinamiit tusaaneqarsinnaasumik.

Ippassaq SIK-p tusagassiuutinut nalunaarutaanut direktør Jens K. Lyberth-ip akissuteqarnermini oqariartuutigaa taamatut sulisunik angerlartitsiinnartariaqarnertik pissusissamisoortoq, tamatumunnga peqqutaasoq tassaammat maannakkut aalisariutit tulaassuisut kujavar­si­mammata, tamannalu namminneq akisussaaffigisinnaanagu.

SIK-mi isumaqarpugut tamanna utoqqatsissutitut atussallugu kimikippallaartoq. Royal Green­land suliffeqarfissuuvoq, Royal Greenland arlalissuarnik kilisaataateqarpoq pilersui­sinnaasunik. Taamaattumiik isumaqarpugut pilersaarusiorluarnermikkut kilisaataatimik fabrikkinut sumiikkaluartunut  pilersuisinnaanerat pitsaanerusumik aaqqissuuttariaqaraat.

Juullilersorsuuvoq, ilaasortavullu allatulli juullimut pissaqarusuttarput. Taannaannaan­ngit­sorli – taamatut ilaasortavut angerlartinneqaannaraangamik ulluinnarni meeqqaminnut pi­lersuisinnaanerat, akiligassaminnullu malinnaaniar­ne­rat taamalilluni mikinngitsumik innarlerneqartarpoq. Aammali Namminersorlutik Oqartussat kommunillu akileraarutitigut isertitassaraluinik innarliisoqartarpoq, taamalu aningaasartuutinik Namminersorlutik Oqartussanut kommuninullu pisariaqanngitsumik pilersitsisarluni.


Illuatungaatigut Royal Greenland sulisussanik qulinik amigaateqaleraangami tusagassiuutinut nalunaaruteqapallattarpoq nipitoorujussuarmik, allaat Kinamiit tusaaneqarsinnaa­su­mik.

Maannakkut imaasiallannerinnakkut ilaasortavut 70-it angerlartiinnarpaat, tamannalu ilaqutariippassuit ulluinnarni inuuniarnerannut soorunami innaarliivoq.

Taamaattumik Royal Greenland pilersaarusiortalerniarli qaammatit novembari decembarilu ilanngullugit.

Qanoq-aasit iliallakkuni Royal Greenland sulisussanik amigaateqaleruni ilasortavut sulisinnaannginnerarlugit nillialissaaq, allaat Kinamiit tusaaneqarsinnaasumik.

 

Jess G. Berthelsen
Kattuffiup siulittaasua