X
GO
da-DKkl-GL
SIK
Feriefondimit angalasut hotelimi unnuisinnaanerat

25. maaji 2020: Periarfissaq tamanut atuuppoq: Danmarkiliarnissamut makitaasimagaluarlutik nunatsinni angalasussanngorlutik bilitsiminnik allanngortitsisimasunut nunatsinnilu angalanissaminnut makitaasimasunut.

Coronap nalornisoortitsinera inuppassuit pilersaarutaannik kalluaavoq – aamma ilaqutariip­passuarnut SIK-p Sulinngiffeqarluni Angalanermut Aningaasaateqateqarfianit (Feriefondimit) makitaallutik 2020-mi angalasussanngorsimasunut.

Danmarkimut angalanissaminnut makitaasimagaluartut tamarmik taamaalillutik neqeroorfigine­qarsimapput tamatumunnga taarsiullugu ukioq manna nunatsinni ornigassamut aalajangersima­sumut feeriarnissaannik.

Neqeroorut tamanna inunnut pineqartunut sms-ikkut nalunaarutigineqarpoq. Maannakkullu nu­natsinni angalaniarlutik bilitsiminnik allanngortitsiniartut bilitsissaannik inniminniineq SIK-mi ingerlanneqaleruttorpoq,

Tamakku pileruttortut, maajip 18-iani, Naalakkersuisut sulisullu kattuffii (SIK taakkununnga ilaal­luni) isumaqatigiissuteqarput 2020-mi sulinngiffeqarnermi akiliunneqarluni angalanerni Kalaallit Nunaanni akunnittarfinni unnuisarneq aamma akilerneqarsinnaasoq akigititaasut iluanni – tassa takornariartitsinermik hoteleqarnermillu ingerlataqartut coronamit ajornartorsiortitaaqisut ikiorserniarlugit.

Tassa imaappoq inuk Kalaallit Nunaanni ornikkamut angalasussanngortoq hotelimi unnuisarnissa­minut Feriefondimit akiliunneqarsinnaavoq akigititap iluani, imaappoq Københavnimut bilitsip nalinginnaasup Kalaallit Nunaannilu ornikkamut aalajangersimasumut bilitsip akiata nikingassu­taan­nik.

Tamanna tunngavigalugu SIK-p Feriefondiata angalasussat Danmarkiliarnissaminnut makitaas­i­ma­galuarlutik nunatsinni bilitsiminnik allanngortitsisimasut nunatsinni angalasussanngorlutik aamma nunatsinni angalanissaminnut makitaasimasut tamaasa neqeroorfigai hotelimi unnui­nis­saminnut akiliunneqarnissaannik, makku najoqqutaralugit:

  • Kalaallit Nunaanni ornikkamut angalanermi – maajip 18-iata kingorna ingerlanneqartussami - bilitsinut aningaasartuutit katillugit Københavnimut angalanissaraluami bilitsinut nali­ngin­naasunut aningaasartuutissanit ikinneruppata Feriefondi Kalaallit Nunaanni hotelimi assigisaannilu unnuinernut akiliussisinnaavoq – nikingassutaasumut naapertuuttumik.
  • Qulaani taaneqartoq isumaqarpoq Kalaallit Nunaanni angalanissaq Københavnimut bilit­simit nalinginnaasumit akisuneruppat taava Feriefondi hotelimi unnuinernut akiliussisin­naan­ngitsoq.
  • Nunatsinni illoqarfimmit Københavnimut inersimasumut/meeqqamut ataatsimut bilitsit nalinginnaasut akii SIK-p allattorpai. Allattukkallu taakku angalasut qasseriarlutik Ferie­fon­dip akiligaanik unnuisinnaanerannik naatsorsuinermi tunngaviussapput.
  • Unnuiffissat suliffeqarfiit allattorsimaffianni cvr-normoqartut kisiisa Feriefondip innimin­niiffigisinnaavai.
  • Feriefondip aalajangissavaa sumi unnuisoqassanersoq. Angalasussalli tamatu­mun­nga tunngatillugu kissaatigisai sapinngisamik akuersaarniarneqassapput.
  • Angalasussat Feriefondip unnuinernut akiliussisinnaanerani pineqartut tamarmik tamatuminnga ilisimatinneqassapput / neqeroorfigineqassapput. Taamaattumik SIK-p allattoqarfiata angalaniartut tamaasa ataasiakkaarlugit telefonikkut aperissavai Kalaallit Nunaanni ornikkamut angalanerminni hotelimi assigisaaniluunniit unnuinissaminnut Feriefondimit inniminniissutsikkusunnersut / akiliutitikkusun­ner­sut. Bilitsiminnik allanngortitsereersimasut taamatuttaaq telefonikkut ne­qe­roor­figineqassapput.