X
GO
da-DKkl-GL
Atorfillit Kattuffiannut tapersiut

6. decembari 2018: Atorfillit Kattuffiata tusagassiuutitigut nalunaarutaanut tapersiut. Tassa SIK-miit aammattaaq Namminersorlutik Oqartussat kaammattorusuppavut piviusorsiortumik isumaqatigiinniarnerit ingerlateqqullugit.

Akissarsiat qaffaatissaat aammalu sulinermi atugassarititaasut allat pillugit isumaqatigiinniarnerit isumarput naapertorlugu isumaqatigiinniarnertut taaneqarsinnaanngillat.

Siumu­ngaaq aaliangertoqareersimavoq ukiunut sisamanut isumaqatigiissuteqassagutta 6%, taakkunannga 1% soraarnerussutisassat qaffaatissaannut atugassat. Piumasaqaatigut amerlaqaat isumaqatigiissutini aaqqiissutaasussat, tamakkuluunniit tassaqa aningaasaliiffigineqarnissamut inissaqarpat.

Oqartariaqarpugut Namminersorlutik Oqartussat isumaqatigiinniartarfiani takusinnaasarput naapertorlugu piviusorsiortumik isumaqatigiinniarnissamik sulisoqanngilaq. Naalakkiiginnarniarput oqarlutik aajuku pissasi, tassa naammagalugit tiguniarsigit. Allaat marloriarluta siorasaarneqarpugut akuerinianngikkutsigu kingumut 1. April 2018 qaffaatissat ilaasortatsinnut tunniunneqanngitsuuinnariaasut. Taamatut siorasaarneqarnerput akuerineqarsinnaanngimmat soorunami Naalakkersuisumut naammagittaalliutigaarput.

Politikerit kommunini aamma Namminersorlutik Oqartussani tamanna aallajangigaraat, taa­maattoq qanoq iliuuseqarusunngillat.

Ata assasi errortorniaqinasigit oqarlusi isuma­qatigiinniarnermut akulerunniarasi. Taamaatto­qan­ngilaq! Maannakkununa ilissi isumaqatigiinniarnermi killiliussasi unittoortitsisut – aki­sus­saaffimmik tigusillusi qanoq iliuuseqarniaritsi.

Jess G. Berthelsen
Kattuffiup siulittaasua