X
GO
da-DKkl-GL
Suleriaatsinik pikkorissarneq


29. aamma 30. maaji 2018: Immikkoortortaqarfiit aallartitaat SIK-llu allattoqarfiani sulisut tamarmik isumasioqatigiillutillu pikkorissaqatigiipput kattuffimmi suleqatigiinneq, allaffissorneq suleriaatsillu pillugit.

 

Ulluni marlunni pikkorissaqatigiinneq pikkorissarsimanermut allagartartaarnermik naliliillatsiarnermillu naggaserneqarluni naammassimmat peqataasut isumalluarnerat malunnarpoq.

Pikkorissarnermi sammisani uteqqiaffigineqartut tassaapput sineriassuarmi ilaasortat sullinneqarneranni suleqatigiinnerup pitsanngorsarneqarnissaa suleriaatsillu erseqqissarneqarnissaat.

 

Suleriaatsinik allattukkat

Pikkorissarnermi tunngavigineqarput suleriaatsinik allattukkat suliassanut assigiinngitsunut 17-inut tunngasut, ataasiakkaarlugit saqqummiunneqartut iluarsaatassanngorlugit ineriartortitassanngorlugillu, atoriaannanngorlugit SIK-p allattoqarfianit allaqqissaarneqartinnagit.

Suleriaatsinik allattukkat assigiinngitsorpaalunnut tunngassuteqarput, soorlu aningaasaqarnermik aqutsinermut, soraarsitsinerit assigiinngitsut qanoq iliuuseqarfiginissaannut kiisalu ilaasortanngortut ilaasortaajunnaartullu qanoq allattorneqarnissaannut.

Allattukkat taakku ilitsersuutinik allanik ilallugit SIK-p nittartagaata ilaanut matoqqasumut iliorarneqassapput.

Ilitsersuutinut tamakkununnga ilaassapput immersugassat nutarsakkat ulluinnarni sulinermi atorneqartartut aamma taaguutinik sulisoqarneq pillugu inatsisilerinermut tunngassuteqartunik nassuiaatit. Taaguutinik nassuiaatini taakkunani ilaatigut pineqassapput ”soraarsitsineq” (afskedigelse), ”peersitsineq” (bortvisning), ”suliunnaarsitaaneq” (fritstilling) aamma ”pisussaajunnaarsitaaneq” (fritagelse).

 

Taava immikkoortortaqarfinni sulisut SIK-llu allattoqarfiani sulisut tamarmik nittartakkap matoqqasortaanut isersinnaassapput ataatsimoorlutik atugassaminnik ujaasiffigalugu – tassa ilaasortat pitsaanerusumik isumannaannerusumillu sullinneqarnissaat pillugu.

Pikkorissarnermi misissuataarneqareersut saniatigut suleriaatsinik allattukkanik allanittaaq suliaqarnissaq pilersaarutaavoq.

 

Ilaasortalerissut

Aammattaaq ”Ilaasortalerissutip” nutaassap piareersarneqarnera pikkorissarnermi ilisimatitsissutigineqarpoq – tassa qarasaasiakkut programmi ilaasortanik nalunaarsuinermi atorneqartussaq (immikkoortortaqarfiit tamanna pillugu immikkut allaffigineqareerput).

Programmi 2019-imi januaarip aallaqqaataanit atorneqalersinnagu soorunami ilaasortat pillugit paasissutissarpassuarnik immerneqaqqaartariaqarpoq. Paasissutissanik katersuineq tamanna immikkoortortaqarfiit suliffinnilu assigiinngitsuni sulisut sinniisaasa suleqatigiilluinnarnerisigut ingerlanniarneqassamaarpoq

Ilaasortalerissutip atulerneratigut ilaasortat pillugit paasissutissanik pisariitsumik sukkasuumillu immikkoortiterisoqarsinnaalissaaq – qassit affaannarmik akiliisarnersut, qassit ukiumi siullermi ilinniartuunersut, nunaqarfik sorleq immikkoortortaqarfinngorsinnaanersoq apeqqutillu allarpassuit paasisaqarfigipallanneqarsinnaanerulissapput.