X
GO
da-DKkl-GL
SISA-mit soraarnerussutisiassat ukiumut tallimararterummik amerlipput

 

19. apriili 2017: Soraarnerussutisiaqalernissamut aningaasaateqarfimmut SISA-mut ilaasortaasut 34.500-t missaanniittut soraarninngorunik inuussutiginiagassaat imaaliallaannangajak tallimararterummik amerlipput.
 

SISA-p illuutaasa ilaata ataani kuultimik uuliamilluunniit nassaartoqarneranik tamanna pissuteqanngilaq. Pissutaasorli tassaaginnarpoq so­raarnerussutisiassanik aningaasaateqarfiup ernialiisarnermut tunngaviusumik periaat­siminik allanngortitsinera, taamaalillutik ilaasortat tamarmik sipaakkamik qaavatigut 21,8 procentinik pissaqalerlutik.

SISA-mi soraarnerussutiassanut katersukkat ukiup ataatsip ingerlanerinnaani taamatut tallimararterummik amerlinerat SISA-p direktøriata Søren Schock Petersenip qaquti­goor­luinnartuunerarpaa. Ukiunimi makkunani erniat appasimmata iluanaarutissaqarniarneq imaannaanngitsuuvoq. Soraarnerussutisiassaqarfiulli siorna ernialiisarnikkut periaatsiminik allanngortitsinerata kingunerisaanik ilaasortat 34.500-uusut eqquerujussu­artutut ipput.

”SISA-p 2016-imi agguaqatigiissitsinikkut ernialiisarnermik taaneqartartoq atorunnaarlugu niuerfinni ernialiisarnermik taaneqartartoq atulermagu aningaasat siornati­gut isumannaallisaaqqinnermut atorneqartaraluartut allatut atorneqarsinnaalerput. Siulersuisut aalajangerput 455 mio. kr.-it ilaasortat sipaagaannut ilanngunneqassasut, taamalu ilaasortat tamarmik sipaagaat ataatsikkut 21,8 procentinik amerlipput,” Søren Schock Petersen taama oqaluttuarpoq.

Agguaqatigiissitsinikkut ernialiisarnermit niuerfinni ernialiisarnermut nuunneq soraarnerussutisiassanik aningaasaateqarfiit amerlanerpaat aamma aqqusaareersimavaat. Tamatumunnga pissutaasoq paasiuminarsarlugu oqaatigissagaanni tassaavoq soraarnerussutisiassanik aningaasaateqarfiup agguaqatigiissitsinikkut ernialiisarnermik atuisup ilaasortat sipaagaannut assigiimmik aningaasalersuisariaqartarnera, ilaasortat qassinik ukio­qarnerat apeqqutaatinnagu. Niuerfinni ernialiisarneq atoraanni allatut aningaasalersuisoqarsinnaavoq, tassa ilaasortat siunissami ungasinnerusumi soraarnin­ngortussat eqqarsaatigalugit aktianut aningaasaliisoqarnerusinnaagami. ”Ataatsimut oqaatigissagaanni aamma taamaalillu­ta obligationinut iluanaarnarpianngitsunut ani­ngaasaliivallaartariaaruppugut,” Søren Schock Petersen nassuiaavoq. Tamatuma ki­ngunerisaanik ukiut ingerlaneranni iluaanarutissat amerlissapput, taamalu aamma ilaasortat soraarnerussutisiassaat qaffassallutik. Aammami ukiumit ukiumut aningaasalersuinermi iluanaarutaasartut allan­ngorarnerannut nalimmassaatitut aningaasaliissuteqartarneq pituttuiunnaartussaavoq.

SISA ataatsimeersuassaaq apriilip 20-ani. Tassani siulittaasoq Jess G. Berthelsen nalunaaruteqartussaavoq ilaatigut ilisimatitsissutigalugu Kalaallit Nunaanni soraarnerussutisiaqalernissamut aningaasaateqarfiup taassuma ilaasortai amerliartuinnartut, taamalu aamma soraarnerussutiassanut akilersuineq annertusiartortoq.

 

Saaffigineqarsinnaasut:

Siulersuisut siulittaasuat Jess G. Berthelsen, tlf. +299 55 88 15

Direktør Søren Schock Petersen, tlf. +45 2061 005