X
GO
da-DKkl-GL
SIK
Pituffimmi nunaqavissut sulisorissallugit salliutinneqanngillat!

7. januaari 2015: Greenland Contractors 2008-mi kingullermik nunaqavissumik atorfinitsitsivoq, taama sulisartut kattuffiat SIK paasisaqarpoq.

– Greenland Contractorsip (GC), Kalaallit Nunaanni Inuussutissarsiummik Ingerlataqartunik Nalunaarsuiffik tunngavigalugu Pituffimmi sakkutooqarfimmi 500-nik pingaarutilinnik suliffissaqartitsisuusup,  iluanaarnartumik sullissinissamik isumaqatigiissutaa  annertuumik politikkikkut oqallisigineqaruttornerani, isumaqatigiissummik piginnittuusimasup GC-p assut ulapputigaa kikkut tamat erseqqissaaviginiarlugit namminneq Kalaallit Nunaat eqqarsaatigalugu amerikarmiut sakkutooqarfianni pinngitsoorneqarsinnaanngitsutullusooq peqataasariaqarnertik – ingammik sulisussanik nunaqavissunik atorfinitsitsisarneq eqqarsaatigalugu aamma lærlinginik ilinniagaqartitsisarneq pissutigalugu. Oqaaseqaatit tamakku ajoraluartumik pissusiviusunut naapertuutinngillat, tassami 2008-mili Pituffimmi kalaallinik nunaqavissunik ikittuinnarnik atorfinitsitsisoqarsimavoq, SIK-p siulittaasua Jess G. Berthelsen oqarpoq.

Jess G. Berthelsen nangippoq: – Annilaarnarpoq Greenland Contractorsimit taamatut aallaqqaataaniilli siunertaasimagaluartut qaangiinnarniarneqarmata, tassa ingammik nunaqavissut sulisorineqarnissaat tamatumunngalu ilutigitillugu ilinniartunik ilinniagaqartitsinissaq, taakku tamatuma kingorna kalaallinut inuiaqatigiinnut iluaqutaaniassammata. Danskit aamma kalaallit politikeriisa ulluni makkunani ulapputigaat isumaqatigiissummik aaqqissuussiniarneq, tassa kalaallinik sulisussanik sulisitsinissamik aamma lærlinginik ilinniagaqartitsinermik salliutitsisussamik.

Uanga isumaga malillugu taamatut imaqanngitsumik oqallinneq eqqarsarnartoqartippara, tassa suleqatigiinnissamut isumaqatigiissummut naleqqiussilluni uanga taamatut pisoqareersimanissaa  taamaattussaasoriinnarakku. Suliaq tamanna qanorluunniit inerneqaraluarpat (Exelis Service, USA imaluunniit GC, Danmark), uanga illuatungeriit arlaannut isumaqatigiissummik pissarsiaqartumut inassutiginiarpara nunaqavissunik atorfinitsitsisarnissamik piumasaqaat eqqorteqqullugu. Imaakkaluarpoq Danmarkimi LO peqatigalugu isumaqatigiissuteqartugut. Kisianni aammattaaq pissusissamisuussaaq sulisitsisup nutaap uagutsinnut toqqaannartumik attaveqarnissaa.

– Nunarput akissaqanngilaq piffissap matuma ingerlanerani millioninik pingasunik kisitsisitalinnik annaasaqarnissaminut, ingammik illuatungeriit marluk – USA aamma Danmark – uagut maani Nunatsinniittugut qulaatiinnarluta assortuunnerat eqqarsaatigalugu, tassa ingerlatsivimmik imaluunniit allaffissornikkut aaqqissuussinermik sorlermik pilersitsineq inatsisitigut eqqortuunersoq pillugu. Jess G. Berthelsen naggasiivoq.