X
GO
da-DKkl-GL
SIK
Ole Magnussen eqqaaniarlugu

9. decembari 2015: Sulisartoqarnerup iluani ilisarisimaneqarluartoq Ole Magnussen sivisuumik napparsimareerluni 78-inik ukioqarluni sapaatiummat 6. decembari 2015 napparsimmavimmi toqukkut qimaguppoq.

Nulia Tippu, qitornai ilaqutaalu qamannga pisumik misiginneqatigaavut.

Ole Magnussen Akullerni inunngorpoq, 1960-ikkullu aallartinneranni Qasigiannguanut angajoqqaanilu nuussimapput. Ukiorpassuarni aalisartutut inuussutissarsiuteqarsimavoq, aasaanerani raajarniaqataasarsimalluni ukiuuneranilu qimussimik ilaatigut Niaqornap tunuani qaleralinniaqataasarsimalluni.

1980-ikkut aallartinneranni sulisartutut inuussutissarsiuteqalerami sulisartut peqatigiiffeqarnerannut appakaassimavoq, ukiunilu arlalissuarni Qasigiannguani Sulisartut Peqatigiiffiat siulittaasuuffigisimavaa piorsaaqataaffigisimallugulu, tamannalu aqqutigalugu SIK-p siulersuisuunerinut ilaasortanngorsimalluni.

SIK-p oqaluttuarisaanerani aningaasatigut annakannajaaleruttorneq nalerorpiarlugu 1988-89-imi SIK-mi siulittaasuuvoq. SIK taamanikkut akiliisinnaajunnaarluinnalersoq isumaqatigiinniarnikkut naaperiaasinnaassutsi atorlugu inuttut isumaqatiginngilluinnaraluakkaminik iliuuseqartariaqarsimavoq, taamaalillunilu SIK aningaasaqarnikkut aqullaarnissaraluanit annaassimallugu.

Ole naaperiaasinnaassuseqarpoq. Taamaattumillu naalakkersuinikkut suliaqartunik attaveqarluartuuvoq, akissarsiallu pillugit isumaqatigiinniartarnerni malartaasersinnaassuseqaraluarluni piviusorsiortuugami naaperiaallaqqissuuvoq.

Olep ilisarnaatigaa sulisartut peqatigiiffianni suliguni imaluunniit kattuffiup siulersuisuunerini suleqataaguni peqatigiiffiup kattuffiullulluunniit aningaasatigut torersumik patajaatsumillu ingerlanneqarnissaanik pingaartitsisuunini.

Inuiaqatigiinni pissakinnerusut illersorneqarnissaat qamuuna pigisaraa. Ukiuni kingullerni arlalippassuarni SIK-p siulittaasuata tulliatut sulereerluni soraarninngorami aamma Nuummi Utoqqaat Peqatigiiffianni suleqataalerpoq, utoqqalinersiiutisiallillu atugarisaasa pitsanngorsarneqarnissaat tassuuna aamma suleqataaffigalugu.

Ole Magnussenimut ukiorpassuarni kattuffimmi suleqataasimaneranut qujassutissaqarpugut tamatumani sulisartut ulluinnarni pitsaasumik atugaqarnissaat pingaartittuarmagu, allaat sorpassuartigut imminut pilliutigaluni.

Ole Magnussenip eqqaaneqarnera ataqqinartuuli.

 

Inussiarnersumik inuulluaqqusillunga
Jess G. Berthelsen, SIK-p siulittaasua