X
GO
da-DKkl-GL
SIK
Napparsimanini pissutigalugu soraarsinneqartoq

12. februaari 2015: Ullut 120-t sinnerlugit napparsimasimanerup kingorna soraarsitaasimaneq pillugu suliamut tunngasoq, aammattaaq ilaasortap sulisunut sinniisuuneranut uppernarsaasersuineq. 

 

SIK-mit kommunit arlaannit ilisimatitsissut tiguneqarpoq napparsimasunut ikiortimik qaammatinik sisamanik siumoortumik nalunaaruteqarluni soraarsitsinissamik siunertaqartoqarneranut tunngasumik, tamatumunnga pissutaalluni isumaqatigiissummi ullut 120-t napparsimasimagaanni soraarsitsisoqarsinnaaneranut aalajangersakkat.

Napparsimasunut ikiortit tassaapput atorfillit Kalaallit Nunaanni Sulisitsisut aamma atorfillit akornanni Inatsisitigut pissutsit pillugit inatsit tunngavigalugu, kisianni ilaasortap atorfinitsinneqarnermut isumaqatigiissutaa Sulisitsisut aamma atorfillit akornanni Inatsisitigut pissutsit pillugit inatsisip 1. Januaari 2014 sioqqullugu suliaavoq. Kommunimit atorfeqartitaanermut ilassut atorfinitsitaanermut isumaqatigiissummut ilanngunneqarsimanngilaq. 

Sulisitsisut aamma atorfillit akornanni Inatsisitigut pissutsit pillugit inatsisimmi ullunut 120-inut aalajangersagaq taamaallaat atorneqarsinnaavoq, tamanna atorfeqartitaanermi atugassarititaasut pillugit isumaqatigiissutini ataasiakkaani allaganngorlugu isumaqatigiissutigineqarsimappat. Suliami matumani taamatut iliortoqarsimanngilaq. Taamaattumik aalaavigineqartariaqarpoq Sulisitsisut aamma atorfillit akornanni Inatsisitigut pissutsit pillugit inatsisimmi soraarsitsinissamut siumoortumik ilisimatitsissuteqarnissat nalinginnaasut, pineqartumi matumani tassaasut qaammatit arfinillit.

Tamatuma saniatigut ilaasortap ilisimatitsissutigivaa nammineq suliffeqarfimmi sulisunut sinniisuulluni. Taamaattumik SIK-mit piumasaqaatigineqarpoq ilaasortap soorarsinneqarnissaanut siumoortumik ilisimatitsissutaasoq qaammatinik pingasunik qaavatigut sivitsorneqassasoq.

Kommunimit nalunaarutigineqarpoq ilaasortarput sulisunit sinniisaanngitsoq, tassa immikkoortortaqarfimmit nalunaarutaasimasut tunngavigalugit suliffimmi nutaamik sulisunut sinniisumik qinersisoqarsimasoq. Paasineqarpoq kukkussuteqarnermik pissuteqartumik ilaasortarput sulisunut sinniisuunera nalunaarutigineqarsimanngitsoq, tassa suliffimmi immikkoortortaqarfinni allani sulisut sinniisaannik qinersereernerup kingornatigut.

Tamatuma kingorna uppernarsarniarlugu ilaasortatta sulisunut sinniisuunerunera SIK tungaanit saqqummiunneqarput makku:

  • SIK-p immikkoortortaqarfiani ataatsimiinnernut peqataasarsimanerit.
  • Pikkorissarnissamut qinnuteqaatit marluk SIK-p pikkorissartitsisarnernut immikkoortortaqarfiani QIA-mi tiguneqarsimasut sulisitsisumit atsiorneqarsimasut. Qinnuteqaatini takuneqarsinnaavoq ilaasortarput sulisunut sinniisuusoq.
  • Qaammatini marlunni nalunaaquttap akunnerisa suliffiusut allattorsimaffiat, taakkunani takuneqarsinnaavoq ilaasortaq pikkorissarnernut peqataasimasoq, nalunaaquttap akunnerisa suliffiusut allattorsimaffiat sulisitsisumit akuerineqarsimapput.
  • Suliffimmi immikkoortortaqarfinni allani sulisut sinniisuisa tamarmik uppernarsarpaat ilaasortarput namminneq sinniisuuneralugu, kiisalu sulisut sinniisuattut qinigaasimanini atorunnaarsinngisaannarsimagaa.

SIK-mit akuleruttoqarnerata kingorna kommunimit akuerineqarpoq uagut ilaasortatta soraarsinneqarnissaminut qaammatinik qulingiluanik siumoortumik nalunaarfigineqarnissaminut piumasaqaataasoq, taamatuttaaq siumoortumik nalunaaruteqarneq qaammammik ataatsimik kinguartinneqassasoq, tassa tusarniaaneq siulleq atorunnaarsinneqarmat tusarniaanerlu nutaatut ingerlanneqalerluni.