X
GO
da-DKkl-GL
SIK
Pissakinnerusunit mamakujuttunik tillinneq

17. decembari 2015: Ilumoorsinnaanerluni pisiniarfiit aamma naalakkersuisut meeqqaniit pissakinnerusuniit juullilersorsuaq mamakujuttunik tillinnerat?

Naalakkersuisut mamakujuttunut akitsuummik eqqusseqqammerput mamakujuttullu akii utsersortutut qaffariarujussuarput. Akitsuutinik akileraarutinut taarsiullugit atuutilersitsineq tamatigorluinnaq inuuniarnikkut eqqungasumik eqquisarpoq, tamannalu piffissamut sivikitsuinnarmut eqqarsarneruvoq Landskarsimi imassaaleqisumi matussusiiniarneq kisiat eqqarsaatigalugu, SIK-p siulittaasua Jess G. Berthelsen isumaqarpoq, oqarporlu:

“Isornarluinnartuuvoq akitsuutinik atuutilersitsineq inuiaqatigiit akornanni innuttaasunik pissakereersunik eqquisumik. Maanna juullilersumi mamakujuttunik akitsuusiineq assersuunneqarsinnaavoq meeqqaniit piitsuniit mamakujuttunik tillinnertut, tamatumalu politikerit qarngisa iluanni mamaatsoornartorujussuussagaluarpoq.”

Jess G. Berthelsen nangippoq:

“Politikerit anguniarunikku uagut innuttaasugut taakkununnga tatiginninnissarput taava uanga sakkortuumik kaammattuutiginiarpara, suut tamaasa nerriviup qaavanut qaqeqqullugit imaanngitsoq, akitsuutinik tassanngaannarsuaq soorlu unnuakkut tillinniatut kingumoortumik atuutilersitsilluni. Taamaattumik SIK akitsuusiinissamut aammattaaq akerliugaluarpoq tamatumunnga taarsiullugu akileraarutit qaffaqqullugit kiisalu kikkut tamarmik nammaqataatinneqassasut.”

Atuisartut aamma pisiniarfiit annertuumik eqqorneqarput

Mamakujuttunut akitsuut kingumoortumik atuutilersinneqarpoq tamannalumi aammattaaq pisiniarfinnut eqquivoq, tassa akigititaminnik qaffaagamik. Tamannalu atuisartunik eqquivoq.

Jess G. Berthelsen nangippoq:

“Takusinnaavarput pisiniarfiit ilaasa akigititaminnik annertunerusumik qaffaasut, tassa akitsuummik qaffasinnerusumik, tamanna isornarluinnartuuvoq isumaqarpungalu pissusissamisuunngilluinnartuusoq pisiniarfiit aamma naalakkersuisut decembarimi innuttaasuniit aningaasanik tigusinerat naatsorsuutitigut angusassatik aamma namminneq missingersuutitik pitsaanngitsut matussuserniarlugit.”

Taamaattumik SIK-mit piumasaqaatiginiarparput misissorneqassasoq ilaasortatta kukkarnaanik poortanik, milluartakkamik imaluunniit sukkulaamik pisigaangata aningaasat sumut ingerlatseqqinneqartarnerat. SIK-mit aammattaaq imissutigissavarput misissortinniarlugu mamakujuttunut akiitsuutip ilumut Landskarsimut amerlanerusunik isertitaqarnissamik kinguneqarnersoq, imaluunniit akigitinneqartut taamarsuaq annertutigisumik qaffatsinneqarnerisa kingunerisaanik ileqquusunik allanngortitsisoqarnersoq, taamaalilluni mamakujuttunik akitsuusiinermut siunertarineqartoq sunniuteqarnani qatangiinnarnersoq.