X
GO
da-DKkl-GL
SIK
Nakkutilliisoqarfik septembarimi ataatsimiissaaq

14. maaji 2020: SIK-p Nakkutilliisoqarfiata ataatsimiinnissaralua corona pissutigalugu kinguartitaq maanna sap. ak. 38-mi pisussatut pilersaarusiorneqarpoq.

Nakkutilliisoqarfik upernassaq marsip naalernerani ataatsimiittussaasimagaluarpoq. Taavali corona nalorninartorsiortitsilerpoq, ataatsimiinnissarlu kinguartinneqarpoq qaqugu pinissaa taanagu. Maanna pilersaarutaalerpoq ukiaru sapaatip-akunnerani septembarip 14-iani aallartittussami ingerlanneqassasoq.

SIK-p siulittaasua Jess G. Berthelsen ataatsimiigiaqqusissummik nutaamik nassiussaqaqqammerpoq.

Ataatsimiigiaqqusissummi allassimavoq ataatsimiinneq Nuummi Hotel Hans Egedemi piumaartoq, tamannalu sioqqullugu pikkorissartoqarumaartoq. Aamma soraarnerussutisiassanik aningaasaateqarfik SISA ataatsimeersuassaaq. Nakkutilliisoqarfiup marsimi ataatsimiinnissaraluani oqaluuserisassat pineqassapput, taamalu nutaanik siunnersuuteqartoqassanngilaq.

Kisianni immikkoortortaqarfiit Nakkutilliisoqarfimmut aallartitassaminnik toqqaaqqissapput. Tamanna nalunaarutigineqassaaq kingusinnerpaamik 4. juuni 2020.

Nakkutilliisoqarfiup suliassai makkuupput SIK-p malittarisassai malillugit:
• Ataatsimeersuarnermi aalajangikkat pivisunngortinneqarnissaat nakkutigissallugu.
• Siulersuisuunerit ataatsimeersuarnermi nakkutilliisoqarfimmilu aalajangikkat naapertorlugit sulinerat nakkutigissallugu.
• Ukiumut tulliuttumut ilaasortat akiliutissaat aalajangiiffigissallugit.
• Ataatsimeersuarnerit akornanni SIK-p ingerlatsinera aalajangiiffigissallugu.
• Isumaqatigiinniarnissani piumasaqaatissanik saqqummiussissalluni.