X
GO
da-DKkl-GL
Mittarfiit sulisussaqarniarnerlu

25. septembari 2018: Piffissami sivitsulersumi mittarfiit tallilerneqarnissaat pillugu oqallinneq tamatumunngalu atatillugu naalakkersuinikkut pisut assigiinngitsut Sulinermik Inuussutissarsiuteqartut Kattuffiannit soqutigalugit malinnaaffigaavut – soorunami.

Nalunanngilarmi qanorluunniit aalajangertoqassagaluarpat aalajangiussat inuiaqatigiinnut akuuffigisatsinnut pitsaaqute­qarlutillu ajoquteqartussaasut nu­nar­­put ataatsimut isigissagaanni. Sumiiffiinni aalajangersimasuni iluarusuutaassapput, sumiiffiilli ilaanni pitsaan­ngit­su­mik kingu­ne­qassallutik. Tamakkulu aamma SIK-p ilaasortaanit taakkualu ilaqu­taa­n­­nit tuusintilikkaanit malugineqanngitsoornavianngillat.

Taamaattoq SIK isumaqarpoq sulisussaqarniarneq eqqarsaatigalugu, aammalu sapinngisamik sulisartut nunaqavissut annertunerpaamik peqataatinneqassappata, kikkunnut ta­manut pitsaanerpaajussasoq mittarfeqarnermi suliassat kittaarlugit ingerlanneqarpata.

Kialluunnimmi takorloorsinnaavaa ataatsikkoorsuaq sananeqassappata avataaniit sulisussanik annertoorujussuarmik tikisitsisariaqassasugut. Taannaannaanngilarli – tamatuma akinut pitsaanngitsumik annertuumik sunniuteqarnissaa naatsorsuutigineqartariaqarpoq sanaartorneq nalinginnaasoq aamma sumiiffinni ingerlanneqassappat. SIK allaat isuma­qarpoq mittarfiit kittaarlugit sananeqarunik akikinnerusumik sananeqarsinnaasut.

Taamaattumik Inatsisartut matumuuna eqqarsarluaqquavut, inuiaqatigiit aningaasaqarnerat aammattaaq eqqarsaatigalugu.

Tamatumunnga atatillugu erseqqissarusunnarpoq Naalakkersuisut siulittaasuata ani­ngaa­sanik taama amerlatigisunik suliniutinut pissarsinera SIK-p nersorneqartariaqartutut isigimmagu. Ameerikkarmiut aningaasaleeqataaniarlutik neqeroorutaat aamma akorluartariaqarpoq iluatigalugulu, tamanna immaqa aamma Kangerlussuup mittarfittut ataannarnissaanut iluaqutaa­sinnaammat.

Inussiarnersumik

Jess G. Berthelsen
SIK-p siulittaasua