X
GO
da-DKkl-GL
SIK
Nuummi Kalaaliaqqap matuneqarnera

15. marsi 2019: Sulinermik Inuussutissarsiuteqartut Kattuffiattut akuerisinnaanngilluinnarparput maannakkut Nuummi Kalaaliaqqap matuneqarsimanera.

Kommuneqarfik Sermersuumi kommunalbestyrelsimut ilaasortat sattaateqalersimanerpat?

Sulinermik Inuussutissarsiuteqartut Kattuffiattut akuerisinnaanngilluinnarparput maannakkut Nuummi Kalaaliaqqap matuneqarsimanera, tunisassaninngooq amigaateqarmat. Illuatungaatigut qulinik alloraanni Brugsenip eqqaani kalaaliminernnik pisiassanik ulikkaarpoq.

Tamanna pissusissamisuunngilaq. Maannakkut Nuummi Brugsenip eqqaaniittoq tuniniaavigissallugu ajoquteqanngilluinnaqqissaarpoq illoqarfiullu qeqqaniilluni. Maannakkut ilaasortavut angerlartinneqarput Kalaaliaqqamut tuniniagassanik eqqussiumasoqan­ngim­mat.

Kalaaliaraq akileraartartut akiligaannik qanoq akilerlugu sananeqarpa? Sooq maannakkut matussava, uffalu qulinik alloraanni kalaaliminernik pisiassanik ulikkaartoq kalaaliaqqamut eqqunneqarsinnaasimagaluartunik.

Kialu qulakkeerpaa taakani tuniniaasut pissusissamisoortumik akileraartut? Taakkuami aamma Peqqinnissaqarfimmik, meeqqerivinnik, atuarfinnik allanillu ilaasortatsitulli atuisuupput.

Ilaasortavut kalaaliaqqami sulisut angerlartitaaginnarput, akissarsiassaarullugit. Taakkuuppullu aamma aningaasarsiamininnguaminnik allatut akileraartaraluartut, soorlu peqqinnissaqarfinnut, meeqqerivinnut atuarfinnut allanullu atugassanik.

Kommunalbestyrelsimut ilaasortat! Sattaatisi peeriarlugit allatulli aaqqiiniaritsi, soorlu Qeqqata Kommuniatulli pinngitsoorani Kalaaliaraq aqqutigalugu kalaaliminernik tuniniaaso­qartassasoq.


Jess G. Berthelsen,
Kattuffiup siulittaasua
mobil 55 88 15