X
GO
da-DKkl-GL
Isumaqatigiissuteqartoqarpoq

20. februaari 2019: SIK-p aamma Namminersorlutik Oqartussat akissarsiat pillugit isumaqatigiinniarnerat sinaakkutissamik isumaqatigiissuteqarnermik inerneqarpoq.

Angusanik isumaqatigiissummi atsiorneqartumi ima allassimasoqarpoq:

"Isumaqatigiinniarnermi angusat ilaat Aningaasaqarnermut tunngassuteqartut, isumaqatigiinniarnermi sinaakkutissatut tunngaviusut.

Akissarsiat ataatsimut katinnerat 1.426.035.445 kr.-inut naatsorsugaavoq, sulisoqarnerlu års­vær­kinut 6.757-inut naatsorsugaalluni.

Isumaqatigiinniarnerit ulloq 14. februaari 2019 nangeqqinneqarput, saqitsaassutaasut pingaartut tassaasimallutik aningaasaqarnikkut sinaakkusiussat tunngaviusut.

Isumaqatigiinniarnissamut pisinnaatitsissut Naalakkersuisunit akuersissutigineqarsimasoq naaper­torlugu ilanngaatissat ilanngaatigereerlugit sinaakkusiussat tassaapput SIK malillugu akissarsiaqar­tut akissarsiaasa tamarmiusut 8,24 procentii, tassa 117.505.321 kr.-it. Ilanngaatissat ilanngaatige­reer­lugit sinaakkusiussat allanngortitassaanngillat.

Taakkua saniatigut soraarnerussutisiassanut akiliutit pitsanngorsarneqarnissaat isumaqatigiissutil­lu pitsanngorsaavigineqarnissaat aningaasassaqartinneqarput, tamatumani sulisunik atatitsiinnar­sinnaaneq sulisussarsiniartarnerlu eqqumaffiginiarneqarlutik. Taamaalilluni ilanngaatissat ilanngaa­­tigereernagit tunngaviusumik sinaakkutissat katillugit 9,35 procentit anguneqarput, tassa 133.321.189 kr.-it. (...)

Ingerlariaqqinnissami aningaasat isumaqatigiinniutigineqartut, tassaasut tapit akissarsianut tunngaviusunut nuutassat, isumaqatigiinnikkut ilanngunneqarsinnaapput, taamaalillutik ilanngaatissat ilanngaatigereer­nagit sinaakkusiussat tunngaviusut amerlisinnaassallutik. Tapit taakku isumaqa­ti­giin­nikkut sulisut ilaaasa aalajangersimasut tunngaviusumik akissarsiaasa qaffaatissaattut ator­ne­qarsinnaapput.

Isumaqatigiinniarnerit inaarutaasumik angusaqarfiusinnaassappata qulaani taaneqartut pisariaqa­vipput. Isumaqatigiinniarnerit inaarsarneqarneranni oqaasertaliussanik iluarsiisoqarsinnaavoq."