X
GO
da-DKkl-GL
Politiit angallataanni inuttat akissarsiaat

29. januaari 2019: Inuit Ataqatigiit siulittaasuata tullia, Inatsisartuni ilaasortaq Aqqaluaq B. Egede nalunaarpoq politiit angallataanni inuttat aningaasarsiaat ikippallaartut. SIK-llu tamanna isumaqa­tigiinnarsinnaavaa.

Pissusiviusummi imaapput: Danmarkip Naalagaaffiata immikkoortor­taq, Moderniseringsstyrelsen, politiit angal­lataanni inuttat, politeeqarfimmi allaffimmiut, eqqartuussiveqarfimmi allaffimmiut, Rigs­ombudsmandimi allaffimmiut, kiisalu Grønlands Kommandomi allaffimmiut SIK-p isuma­qatigiinniuttarpai. Tas­sanilu isumaqatigikutsoorparput aamma taakkua aningaasarsiakip­pallaarujussuarmata.

Kisianni tassa imaappoq, Moderniseringsstyrelsemut isumaqatigiinniaraangatta Nammi­nersorlutik Oqartussat tunniussaanniik anginerusumik qaffaarusunneq ajorput, taamaattumik taakkua allaffimmiut aningaasarsiaat aamma annikipput.

Taamaattumik paasiuminaatsilaarpara maannakkut sooq pisortanut isumaqatigiinniar­ner­mi Inuit Ataqatigiit kimigiisinngitsut Namminersorlutik Oqartussat anginerusumik qaffaaq­qul­lugit. Tassami assersuutigalugu Namminersorlutik Oqartussat 20 procentimik qaffaappata aamma Moderniseringsstyrelsen taamatut qaffaassaaq.

Aamma Inuit Ataqatigiit Naalakkersuisuunermi nalaanni annertunerusumik qaffaasarsi­ma­galuarpata tamanna politeeqarfiup ataani sulisunut ilorraap tungaanut sunniuteqarsimassagaluarpoq. Kisianni Inuit Ataqatigiit aningaasaqarnermut Naalakkersui­su­tut issiavik tigummigallarmassuk qaffaat annikitsuararsuusimavoq.

Taamaattumik Inuit Ataqatigiit kajumissaaginnarsinnaavakka maannakkut pisortanut isumaqatigiinniarnitsinni aningaasarsiat maannakkut neqeroorutigineqartunit annertunerungaatsiartumik qaffaaffigineqartariaqarnerinik nilliaqataaqqullugit.

 

Jess G. Berthelsen                                                                                                                 
SIK, Kattuffiup siulittaasua