Ataatsimeersuarneq SIK-p oqartussaanerpaartaraa, malittarisassallu malillugit ukiut sisamakkaarlugit ataatsimeersuartoqartassaaq septembarimi oktobarimiluunniit.

Sivikinnerpaamik qaammatinik tallimanik sioqqutsilluni ataatsimeersuariaqqusisoqartussaa­voq, taamalu siulittaasoq Jess G. Berthelsen siulersuisuunerit sinnerlugit ataatsimiigiaaqqusissummik allagaqaqqammerpoq. Ataatsimeersuarnissaq pissaaq ulluni 2. aamma 3. septem­bari 2021, Ilulissani Hotel Arctic-imi.

Ataatsimiigiaqqusissummi taaneqarpoq corona pissutigalugu allatut aaqqissuusisariaqalissan­ngikkutta taamaassasoq. Imaappoq allatut iliornissaq sillimaffigisariaqassaaq.

SIK-p ataatsimeersuarnerani immikkoortortaqarfiit maanna 21-usut aallartitaat peqataassapput, immikkortortaqarfiit ataasiakkaat ilaasortaqqortussusiat naapertorlugu amerlassuseqartussanik.

SIK-p sulisartut kattuffiattut sulissutigisassai pingaarnerit ataatsimeersuarnerni oqallisigineqarlutillu aalajangersarneqartarput. Aamma siulittaasumik, siulittaasup tullianik siulersuisuunernullu ilaasortanik qinersisoqartarpoq.

Ukiaru ataatsimeersuarnissamut oqaluuserisassanngortitanik tunniussivissaq ulloq kingulleq tassaavoq 2. juuni 2021.

Aasaru ukiut 65-inngortussaapput SIK-p pilersinneqarneranit. Sinerissami ”laajat” peqatigiiffii arlalinnguit kattuffimmik pilersitsisuusimapput, taamanilu kattuffiup taaguutigaa GAS (Grønlands Arbejder Sammenslutning).