X
GO
da-DKkl-GL
Aalisariutaatillit, umiartortut aammalu inuiaqatigiit eqqorneqassapput

 

23. marsi 2017: Aalisarnermut Naalakkersuisup Hans Enoksenip avataani aalisagassiissutinik 10%-inik ikilisaaniarluni aaliangiussinera aalisariutini inuttaasunut annertuumik eqquissaaq.

 

Aalisariutinimi inuttaasut pisat isertitsissutaanerat tunngavigalugu aningaasarsitinneqartarput, taamaattumillu pisassiissutit apparpata, taava aningaasarsiatut pissarsiassat aamma appassapput. Aalisariutini sulipput inuit 1.400-ut missingi. Tamarmillu aningaasarsiat apparnernerinik eqqorneqarsinnalissapput, aammalu aalisagassiissutinik appaaneq peqqutigalugu inuttaasut 150-it missingi minnerpaamik qaammammi ataatsimi suliffissaarutsitaasussaassapput. Tamatumunngalu peqqutaavoq Hans Enoksen-ip pisassiissutit 10%-ii aalisartunut allanut tunniuttalerniarmagit, naak annertuallaartumik aalisartoqareeraluartoq.

Aalisagassiissutit ikiliniarlugit aaliangiineq inuiaqatigiit aningaasaqarnerannut ammut naqitsissaaq, taamatut nassueruteqarpoq Hans Enoksen. Kisianni tamatumanit sunnertinngilaq, kisianni aalisarnermik inuussutissarsiortut akornanni toqqissimajunnaarutaaqaluni, naatsorsuutigaarpullu aaliangiisimaneq naalakkersuisooqatigiinnit tamarmiusunit tunuliaqutserneqarsimasoq. Tamannalu inuussutissarsiutit Landskarsimut tunniussuinerpaajusut tunngaviannik ”pinnguarinninneruvoq”. Tassami Seafoodip ingerlataani aali annerpaat marluinnarni kalaallit aningaasaqarnerat 26%-inik tunngaviligaavoq, 2015-imilu avammut tunisassiornermi aalisakkanik tunisassiorneq isertitat 53%-inik tunngaviliilluni kiisalu nunatsinni sulisut tamakkiisut 15%-ii aalisarnermi sulillutik.

Avataanilu aalisarnernermi nalit qaffariaataat  sinerissamut qanittumi aalisarnermit pissarsissutaasarnermikkut pingasoriaammik annertunerupput sulisumut ataatsimut nalit pinngortinneqartartut naatsorsoraanni.

Hans Enoksenilu isumaqanngilaq aalisagassiissutinik appaaneq aalisariutaatilinnut sunniuteqarumaartoq. Inuussutissarsiuteqartulli oqaloqatigisimagaluarunigit, paasisimassagaluarpaa, appaaneq taakkununnga isertitatigut annertoorujussuarmik sunniuteqartussaassammat. Ukiuni amerlesuni aalisarnermik ingerlatsisut isumaqatigiissutigisimavaat aalisarsinnaasutut pigineqartut imminut akilersinnaanerpaamik atorneqassasut. Tamannalu allanngujaanneroqisumik isertitsissutaalersimavoq aammalu kilisaatini sulisuusunut, tassami aalisarnermi angallatit ingerlanneqartut amerlavallaarmata.

Maanna ernumassutigisinnaavarput qanga atugarliornerit uterfigeqqinnissaat, taamani akiliisinnaajunaartartut tulleriiaaginnarallarmata sulisuusullu akissarsiakilliortitaagallarmata.

Hans Enoksenip aaliangiinera piffissaq ungasissoq isigalugu napaannarsinnaanermut ulorianartorsiortitsivoq aammalu eqqorneqarluni aalisariutini sulisut naammaginartumik isertitaqarsinnaanerat, taakkumi inuuniutaat mangianneqalerpoq. SIK aamma Kalaallit Nunaanni Sulisitsisut Peqatigiiffiat (GE) isumaqarput aaliangiineq isumatusaarnerunngitsoq.
 

Jess G. Berthelsen
SIK-p siulittaasua  
Brian Buus Pedersen
Sulisitsisut Peqatigiiffianni pisortaq