S.I.K.-p INATSISAI                                                            2009-MI AALAJANGIUSSAT

§ 1

Kattuffiup aqqa najugaqarfialu

Sulinermik Inuussutissarsiuteqartut Kattuffiat (S.I.K.) sulinermik inuussutissarsiuteqartut peqatigiiffiisa Kalaallit Nunaanni kattuffigaat.

Imm. 2. SIK-p qullersaqarfia Nuummi najugaqarfeqarpoq.

§ 2. Siunertaq.

SIK-p anguniarpaa sulisitsisunik isumaqatigiissutit aqqutigalugit sulinermik inuussutissarsiuteqartut akissarsiatigut, inuuniarnermi atugarisatigut, ilinniarfissaqartitaanikkut, suliffissaqarniarnikkut suliffimmilu toqqissisimanartumik oqartussaaqataallutillu pitsaasunik atugassaqartitaanissaat.

Imm. 2. Ilaasortat napparsimanerminni, naartunermi ernereernermilu, meerarsiartaarnermi, suliffimmi ajoqusernermi atornerluinermullu katsorsartinnermi isertitatigut annaasaqannginnissaat sapinngisamik qulakkeerniassallugu, kiisalu soraarnerussutisiaqalersarnermik aaqqissuussinikkut utoqqalinermi inuuniarnermi atugarisaasa appariarpallaannginnissaat isumaginiassallugu.

Imm. 3. Inuiaqatigiinni innuttaasunut periarfissarititaasut atugassarititaasullu sapinngisamik tamanut naligiimmik iluaqutigineqarsinnaanissaat SIK-p anguniarpaa.

Imm. 4. Arnaaneq angutaanerluunniit, ammip qalipaataa, qassinik ukioqarneq, innarluuteqarneq, upperisaq naalakkersuinikkulluunniit isummertarneq aallaavigalugit immikkoortitsisoqannginnissaa, inuiaqatigiinnili tamanut toqqissisimanartumik inuuneqarnissamut periarfissiisoqarnissaa SIK-p anguniarpaa.

§ 3 Immikkoortortaqarfiit klub-illu.

S.I.K. immikkoortortaqarfeqarpoq imm. 2-mi aalajangersakkat naapertorlugit. Taakkulu saniatigut immikkoortortanut ilaasortanngorsinnaapput sulinermik inuussutissarsiutillit soqutigisaqaqatigiiffittut § 4 naapertorlugu nuna tamakkerlugu peqatigiiffinngorsimasut tamarmik.

Imm. 2. Nunaqarfinni illoqarfinnilu sulinermik inuussutissarsiutillit peqatigiiffii suli S.I.K.-mut ilaasortanngorsimanngitsut, qaammatini kingullerni arfinilinni (6) agguaqatigiisillugu 25-t angullugit ilaasortaqartut immikkoortortaqarfinngorniarlutik S.I.K.-mut qinnuteqarsinnaapput. Ilaasortalli 25-t inorpagit klub-itut immikkoortortaqarfimmut qaninnerusaminnit nakkutigineqarlutik ingerlasinnaapput.

Taamaattorli klub-inngortut kissaatigippassuk tamakku toqqaannartumik S.I.K.-mit nakkutigineqarsinnaapput.

Imm. 3. S.I.K.-p ataatsimeersuarnerani Nakkutilliisoqarfiullu naapinnerani akuersissutigineqarlutik aalajangersakkat, anguniakkat il.il taakkualu tunngavigalugit S.I.K.-p maleruaqqusaliai immikkoortortaqarfinnit tamanit atortinneqartassapput.

Imm. 4. Kinaluunniit 14-inik ukioqalersimasoq S.I.K.-llu siunertaanut § 2-mi taagorne-qartunut peqataajumasoq immikkoortortaqarfimmut ilaasortanngorsinnaavoq.

Imm. 5. S.I.K.-mut immikkoortortaqarfinngorniarluni qinnuteqaat S.I.K.-mi siulersuisuunernut allaganngorlugu nassiunneqassaaq. Immikkortortaqarfinngorniarlutik qinnuteqartut S.I.K.-p inatsisaanut aalajangersagaanullu maleruaajumallutik akuersisut kiisalu minnerunngitsumik imm. 2-mi aalajangersakkamik naammassinnissimasut immikkoortortaqarfittut ilaasortanngortinneqarsinnaapput.

Immikkoortortaqarfinngornermik akuersissummik nalunaarut tiguneqariarpat immikkoortortaqarfinngortoq S.I.K.-p ilaasortaanermut maleruaqqusai naapertorlugit akiliuteqartalissaaq.

Imm. 6. Immikkoortortaqarfinngorumallutik qinnuteqartut siulersuisuunernit itigartinneqarsimagunik pisinnaatinneqarput siulersuisuunerit tullianik ataatsimiinnissaannut aallartitaqarumassallutik, imaluunniit Ataatsimeersuarnissamut tulliuttumut imaluunniit Nakkutilliisoqarfiup ataatsimiinneranut naammagittaalliuteqassallutik.

Imm. 7. Immikkoortortaqarfiit qanoq akulikitsigisumik / akuttutigisumik ataatsimeersuartassanerlutik namminneq aalajangertassavaat, ataatsimeersuartitsinerli kingusinnerpaamik ukiut sisamat ingerlareernerisigut pisassaaq. Ataatsimeersuarneq sapinngisamik januarip marsillu akornanni pisassaaq. Ataatsimeersuarnermi qanoq ingerlasimanermut nalunaarut, naatsorsuutit kukkunersiorneqarsimasut, anguniakkat pillugit qanoq aalajangersaasimanerit, taamatullu kikkut qinigaasimanersut S.I.K.-mut nalunaarutigineqartassapput.

Imm. 8. Siulersuisuunerit suliatik apeqqutillu pingaaruteqartut immikkoortortaqarfinnut nalunaarutigisassavaat.

Imm. 9. Immikkoortortaqarfinnik ilaasortaajunnaarsitsineq S.I.K.-p siunertaanik inatsisaanillu unioqqutitsisoqarsimatillugu aatsaat pisinnaavoq ataatsimeersuartut 2/3-iisa ilaasortaajunnaarsitsineq akuersissutigippassuk. Tamatuma kingorna ataatsimeersuartut aalajangernerat siulersuisuunerit nalunaarutigisassavaat.

Imm. 10. Immikkoortortaqarfik 25-t inorlugit ilaasortaqalerpat siulersuisuunerit pisinnaatitaapput immikkoortortaqarfik pineqartoq immikkoortortaqarfittut naatsorsuukkunnaarlugu klub-itut ingerlalerneranik nalunaarfigissallugu, tamannalu pillugu immikkoortortaqarfik qaninnerusaa tamatuminnga nalunaarfigissallugu. Immikkoortortaqarfiujunnaarnermik nalunaaruteqartoqarsimanngippat immikkoortortaqarfik pineqartoq immikkoortortaqarfittut naatsorsuunneqaannarallassaaq, inatsisillu malillugit pisussaatitaaffiit assigiinngitsut pisussaatitaaffigalugit.

§ 4 Immikkoortortaqarfinni soqutigisaqaqatigiiffiit,

nuna tamakkerlugu soqitigisaqaqatigiiffiit peqatigiiffii

Immikkoortortaqarfiit pisinnaatinneqarput najukkaminni pissutsit aallaavigalugit suliat tunngavigalugit soqutigisaqaqatigiiffinnik sunilluunniit pilersitsisinnaallutik. Immikkoortortaqarfinni soqutigisaqaqatigiiffinnik pilersitsiortoqareernerisigut, immikkoortortaqarfinni soqutigisaqaqatigiiffiit qulit, agguaqatigiisillugu tamarmik immikkut 25-nik ikinnerunngitsunik ilaasortaqarnissaq anguppatigit nuna tamakkerlugu soqutigisaqaqatigiiffiit peqatigiiffiannik pilersitsisoqarsinnaavoq, peqatigiiffimmik pilersitsisoqarnissaq soqutigisaqaqatigiiffinnit pisariaqartinneqarpat, imm. 2-milu aalajangersakkat naammassineqarpata.

Imm. 2. Nuna tamakkerlugu soqutigisaqaqatigiiffiit peqatigiiffiannik pilersitsisoqannginneranni makkua naammassineqareersimassapput: S.I.K.-p inatsisaani § 2-mut akerliunngitsumik malittarisassat pilersinneqassapput, immikkoortortaqarfigineqartussat qulinit ikinnerussanngillat – agguaqatigiisillugu tamarmik 25-nik ilaasortaqassapput, nuna tamakkerlugu peqatigiiffinngorniarluni ingerlatsinissamut tunngavissat assigiinngitsut naammassineqarsimassapput, nuna tamakkerlugu peqatigiiffinngorniarluni ataatsimeersuarneq ingerlanneqareersimassaaq.

Imm. 3. Imm. 1 aamma 2 naammassineqarsimappata, taamaalillunilu peqatigiiffittut ingerlanissamut tunngavissat pilersinneqarsimallutik, S.I.K-mut immikkoortortaqarfinngorniarluni qinnuteqaat allaganngorlugu siulersuisuunernut ingerlatinneqassaaq. Siulersuisuunerit piumasarineqartut naammassineqarpata peqatigiiffiup ilaasortanngorniarnera akuersissutigissavaat, peqatigiiffittut ilaasortanngorniarneq akuerineqassanngippat peqatigiiffiup siulersuisui pisinnaatinneqarput siulersuisuunerit aalajangernerat S.I.K.-p Ataatsimeersuarneranut Nakkutilliisoqarfiulluunniit ataatsimiinneranut naammagittaaliuuteqassallutik. Ilaasortanngorniarneq siulersuisuunerit akuersissutigisinnaanngippassuk Ataatsimeersuarnermi imaluunniit Nakkutilliisoqarfiup ataatsimiinnerani siulersuisuunerit aalajangernerat allanngortinneqarsinnaavoq.

Imm. 4. Nuna tamakkerlugu soqutigisaqaqatigiiffiit peqatigiiffii kisimik S.I.K.-mut immikkoortortaqarfittut ilaasortanngorsinnaapput, immikkoortortaqarfiit ataani soqutigisaqaqatigiiffiit nuna tamakkerlugu peqatigiiffiunngitsut immikkoortortaqarfinnut ilaasortaappat toqqaannartumik S.I.K.-mut ilaasortanngorsinnaanatik.

Imm. 5. Nuna tamakkerlugu peqatigiiffiit S.I.K.-mut immikkoortortaqarfinngornissaminnik akuerineqarsimasut inatsisini immikkoortortaqarfinnut pisinnaatitaaffiit tamaasa pisinnaatitaaffigaat.

§ 5 Sulinermik Inuussutissarsiuteqartut Kattuffiata aaqqissuussaanera.

   1. Ataatsimeersuarneq

   2. Nakkutilliisoqarfi

   3. Siulersuisuuneri
 
   4. Ulluinnarni aqutsisu

   5. Immikkoortortaqarfii

   6. Peqatigiiffii

   7. Soqutigisaqaqatigiit ataasiakkaat

§ 6 Ataatsimeersuarneq.

Ataatsimeersuarneq S.I.K.-p oqartussaanerpaartaraa – ataatsimeersuarnermilu aatsaat inatsisit allanngortinneqarsinnaapput atorunnaarsinneqarsinnaallutillu. Kattuffiup iluani ajornartorsiutit tamat ataatsimeersuarnermi aalajangiiffigineqarsinnaapput.

Ataatsimeersuarnermi siulersuisuunernut ilaasortat § 9 tunngavigalugu qinerneqartussaapput.

Siulersuisuunerit akisarsiaat ataatsimeersuartunit aalajangerneqartassapput, taamaattorli qinikkat atorfeqartitat honorarisiaqartinneqarsinnaanngillat.

Imm. 2. S.I.K. ukiut sisamat qaangiunneri tamaasa nalinginnaasumik ataatsimeersuartassaaq. Ataatsimeersuarnerlu qaammammi septemberimi oktoberi-miluunniit ingerlanneqartassaaq Qaqortumi Sulisartut Højskolianni.

Imm. 3. Ataatsimeersuarnissamut siunnersuutit tassani aalajangersarneqartussat ataatsimeersuarnissaq qaammatinik pingasunik sioqqullugu S.I.K.-p qullersaqarfianut immikkoortortaqarfinniit, immikkoortortaqarfinni siulersuisunit oqaluuserineqareerlutik, ingerlaqqinnissaallu akuersissutigereerlugit, nassiunneqartassapput, qaammallu ataaseq sioqqullugu siunnersuutit immikkoortiterlugit suliarilluarneqareersimasut immikkoortortaqarfinnut utertinneqartassapput.

Imm. 4. Siulersuisuunernit ataatsimeersuarnissamut qaaqqusineqartinnagu ulluinnarni aqutsisunit uppernarsarneqaqqaarallassaaq immikkoortortanit ilaasortat qassit S.I.K.-mut akiliuteqartarnersut – tamannalu naapertorlugu immikkoortortaqarfiit piaartumik tamatuminnga nalunaarfigineqassapput.

Imm. 5. Immikkoortortaqarfiit ukiup affaani kingullermi S.I.K.-mut akiliuteqarsimanngitsut ataatsimeersuarnermut aallartitaqarsinnaanngillat.

Imm. 6. Soqutigisaqaqatigiiffiit, peqatigiiffiit imaluunniit immikkoortortaqarfiit ataatsi-meersuarnermut aallartitaqartut, imm. 5-imi piumasarineqartunik naammassinnissimasut taaseqataasinnaapput peqataasoq ataaseq ataatsimik nalilerlugu. Qanoq ilaasortaqartigissuseq naatsorsorneqartassaaq ukiup ataatsimeersuarfissap siuliani Kattuffiup naatsorsuutitigut angusimasai naapertorlugit. Ilaasortallu naatsorsorneqarsimasut amerlassusii naapertorlugit ima amerlatigisunik taaseqataasinnaasunik peqataatitaqartoqartassaaq:

                      Ilaasortat 25-niit 250-nut      1

                      Ilaasortat 251-niit 500-nut    2

                      Ilaasortat 501-niit 750-nut    3

                      Ilaasortat 751-t sinnerlugit    4

Sinniisorineqarlutik aallartitat ataatsimeersuarnermi oqaaseqarsinnaatitaallutillu taaseqataasinnaapput.

Immikkoortortallu (klub-it) peqataasinnaatitaapput oqalliseqataasinnaallutik kisianni taaseqataasinnaanatik. Immikkoortortaniit peqataasut immikkoortortaqarfiup nammineq akiliuttassavai.

Imm. 7. Ataatsimeersuarnermi taasinerit allaganngorlugit imaluunniit peqataasut aqqisa suaarutiginerisigut ingerlanneqartassapput.

Imm. 8. Ilaasortaanermut allagartaq atorsinnaasoq ataatsimeersuarnerup aallartinnerani takutinneqartassaaq.

Imm. 9. SIK-p siulittaasuatut qinigassanngortissagaanni tamanna ataatsimeersuarnissaq qaammatinik pingasunik sioqqullugu S.I.K.-p qullersaqarfianut immikkoortortaqarfinnullu nalunaarutigineqareersimasassaaq.

§ 7 Immikkut ittumik ataatsimeersuarneq.

Siulersuisuunerit tunngavilersukkanik kissaateqarnerat aammalu immikkoortortaqarfinnit tapersersorneqarnerat naapertorlugu immikkut ittumik ataatsimeersuartitsineq pilersinneqarsinnaavoq.

Imm. 2. Immikkoortortaqarfiit affaanit amerlanerusut tamanna piumasarippassuk immikkut ittumik ataatsimeersuartoqassaaq.

Imm. 3. Immikkut ittumik ataatsimeersuarneq § 6 malillugu ingerlanneqassaaq.

Imm. 4. Immikkut ittumik ataatsimeersuarnerit nalinginnaasumik ataatsimeersuarnertulli kimeqartigimmata immikkut ittumik ataatsimeersuarneqareertillugu aamma aatsaat ukiut sisamat qaangiunnerisigut nalinginnaasumik ataatsimeersuartoqarsinnaavoq.

Imm. 5. Peqataasut amerlanerusut kissaatigippassuk immikkut ittumik ataatsimeersuarneq siulersuisuunernut ilaasortassanik qinersinertaqanngitsumik ingerlanneqarsinnaavoq.

Imm. 6. Immikkut ittumik ataatsimeersuartoqarnissaanik piumasaqarneq imm. 1 imaluunniit imm. 2 najoqqutaralugu piumasaqartoqarneraniit qaammatit pingasut qaangiutsinnagit ataatsimeersuarneq ingerlanneqassaaq.

§ 8 Nakkutilliisoqarfik.

Nakkutilliisoqarfiup siunertaraa ataatsimeersuarnermi aalajangersakkat piviusunngortinneqarnissaat eqqortinneqarnissaallu nakkutigissallugit.

Imm. 2. Nakkutilliisoqarfiup pisussaaffigaa S.I.K.-p aningaasatigut patajaatsumik ingerlanissaa aamma ataatsimeersuarnermi aalajangikkat naapertorlugit siulersuisuunerit sulinerat nakkutigissallugit aammalu pisinnaatitaalluni ataatsimeersuarnerup saniatigut ilaasortat akiliutaannik qaffaasinnaalluni.

Imm. 3. Nakkutilliisoqarfik tassaavortaaq politikkikkut anguniagassanik oqalliffiusartoq.

Imm. 4. Nakkutilliisoqarfik ataatsimiisinneqartassaaq upernaakkut qaammammi martsimi aprilimiluunniit. Nakkutilliisoqarfiullu ataatsimiinnerani sammineqassallutik S.I.K.-p ataatsimeersuarnerata aalajangersagai, kiisalu akissarsiat pillugit isumaqatigiinniutigineqartussat aalajangersaaffigineqarneri.

Taamatuttaarlu sulisoqarnermi pitsanngorsaatigineqartussat pillugit Inatsisartut ataatsimiinnissaannut siunnersuuteqarfiusassalluni.

Imm. 5. Ulluinnarni aqutsisut pisussaaffigaat Nakkutilliisoqarfiup ataatsimiinnissaannut paasissutissat assigiinngitsut immikkoortortaqarfinnut tamanut nassiutissallugit ataatsimiinnissaq qaammammik ataatsimik sioqqullugu.

Imm. 6. Nakkutilliisoqarfik inuttaqartinneqassaaq immikkoortortaqarfiit iluminni toqqagaannik.

§ 9 Siulersuisuunerit.

Siulersuisuunerit qulingiluaasut sinniisussallu ataatsimeersuarnermi qinerneqartassapput – ukuusut:

1.      Siulittaasoq

2.      Siulittaasup tullia

3.      Ilaasortat arfineq marluk (7)

4.      Sinniisussat tallimat

Imm. 2. Siulersuisuunernut ilaasortat akisussaaffiisa suliassaasalu agguataarneqarneri siulersuisuunerit namminneq iluminni aaqqissuuttassavaat.

Imm. 3. Siulersuisuunerni ilaasortaq naalakkersuinermi suliaqartussatut qinigaasimaguni, nammineq aalajangertassavaa siulersuisuunerninngaanniit tunuassanerluni. Allamilli pissuteqarluni sivisunerusumik qimagussimasariaqassaguni, siulersuisuunernut sinniisussatut qinerneqarnerpaasimasoq siulersuisuunernut ivertinneqassaaq.

Imm. 4. Siulersuisuunerniluunniit ilaasortaq naalakkersuinikkut suliaqartussatut qinigaanermini sulisitsisutut inissisimalissappat (borgmesterinngorluni, Naalakkersuisuni ilaasortanngorluni) piaarnerpaamik tunuartassaaq.

Imm. 5. Siulersuisuunerit pisussaatinneqassapput ulluinnarni aqutsisut akornanni S.I.K.-p aningaasaataanik atornerluisoqarsimatillugu, taamatullu uppernarsaatissaqartumik takussutissaqartoqartillugu, tunuartitsisinnaanissamik.

Imm. 6. Siulersuisuunerit pisinnaatinneqassapput siulersuisuunernut ilaasortat ilaannik tunuartitsisinnaanermut, pineqartoq S.I.K.-p pappiaraataanik Kattuffiullu siunertaanut siunertaanullu akornutaasumik siulersuisuunernit immikkut akuerineqanngitsumik oqaatsitigut tusagassiuutitigulluunniit siaruarterisimappat.

Imm. 7. Ukioq 1989 aallarnerfigalugu siulersuisuunerit pisinnaatitaaffeqalerput S.I.K-mi ingerlanerliortoqartillugu imaluunniit immikkoortortaqarfiit toqqissisimajunnaarnerini, pisut iluarsiumallugit Nakkutilliisoqarfik piaarnerpaamik ataatsimiigiaqqussallugu.

§ 10 Ulluinnarni aqutsisut.

Siulittaasoq, siulittaasullu tullia – SIK-mit atorfeqartinneqartussat – illoqarfimmi ataatsimi najugaqartassapput, taakkuli arlaat nuuttariaqassappat(-ta) Kattuffiup aningaasartuutigissavaa(-vai).

Imm. 2. Ulluinnarni aqutsisunut ilaasortat akisussaaffiisa suliassaasalu agguataarneqarneri ulluinnarni aqutsisut namminneq iluminni aaqqissuuttassavaat.

Imm. 3. Ulluinnarni aqutsisuni ilaasortaq kommunalbestyrelsimi, aamma Inatsisartuni suliaqartussatut qinigaassaguni, nammineq aalajangertassavaa siulersuisuunerninngaaniit tunuassanerluni. Allamilli pissuteqarluni sivisunerusumik qimagusimasariaqassaguni, § 9 imm. 1-imi tulleriissaarineq naapertorlugu ulluinnarni aqutsisut sinnerisa inissisimaffii qaffaallatsinneqassapput. Taamatuttaaq siulersuisuunernut ilaasortani qinigaanerpaasimasoq qummut qaffaallatsinneqartassaaq.

Imm. 4. Ulluinnarni aqutsisuni ilaasortaq naalakkersuinikkut suliaqartussatut qinigaanermini sulisitsisutut inissisimalissappat (borgmesterinngorluni, Naalakkersuisuni ilaasortanngorluni) ingerlaannartumik tunuartassaaq.

Imm. 5. Ataatsimeersuarnermi imaluunniit Nakkutilliisoqarfeqarnermi aalajangersakkat aningaasanut tunngasut ulluinnarni aqutsisut piaarnerpaamik allaffitsigoortumik susassaqartunut tamanut allakkatigut nalunaarutigisassavaat.

§ 11 Aningaasat.

S.I.K.-mut akiliutit qanoq annertutiginissaat ataatsimeersuarnermi Nakkutilliisoqarfiullu ukiumoortumik naapinneranni siumut missingersuusiorsimanerit tunngavigalugit aalajangiiffigineqartassapput. 18-it inorlugit ukiullit, ilinniartut ullullu affaanik sulisartut affaannarmik akiliuteqartassapput.

Imm. 2. Ilaasortaanermut akiliut sapinngisamik aningaaserivitsigoortumik (BS) akilersorneqassaaq.

Imm. 3. SIK-p immikkoortortaqarfiillu arlaasa akiliut tamakkerlugu tigusimagunikku, pisussaapput SIK-p immikkoortortaqarfiilluunniit pisassaat piaartumik nassiutissallugit.

Imm. 4. S.I.K.-mi aningaasatigut aqutsineq siulersuisuunerit ataatsimeersuarnerni Nakkutilliisoqarfiullu naapittarnerini aalajangersarneqarsimasut tunngavigalugit akisussaaffigaat.

Imm. 5. Ataatsimeersuarnerni nakkutilliisoqarfiullu naapittarnerini aalajangersarneqarsimasut saniatigut immikkut aningaasartuuteqartoqassatillugu siulersuisuunerit aalajangiineri atuuttassapput.

Imm. 6. Suliumajunnaarnissamut aningaasaateqarfimmut ilaasortap ataatsip akiliutaanit toqqorterisoqartassaaq – taakkulu S.I.K.-p ingerlatsinermut karsiani katersuiffeqartinne-qassapput, (konto-qartinneqassapput) pisariaqarpallu nalilinnut qularnaatsunut inissin-neqarsinnaassallutik.

Aammattaarlu S.I.K.-p ataatsimeersuarnerani kiisalu Nakkutilliisoqarfeqarnerani siulersuisuunerit inassuteqartassapput qanoq annertutigisumik tassunga katersuiffimmut nakkaatitsisoqassanersoq. Tamannalu ataatsimeersuaqataasunut aalajangigassaganngorlugu inassutigineqartassaaq.

Suliumajunnaarnissamut aningaasaateqarfiup aningaasaataanit atuisoqarsinnaanngilaq siulersuisuunerit akuersiseqqaartinnagit.

Imm. 7. S.I.K.-p naatsorsuutai kukkunersiuisunit ataatsimeersuarnermi toqqarneqartunit kukkunersiorneqartassapput. Ataatsimeersuarnerni Nakkutilliisoqarfeqarnermilu akuerisassanngorlugit saqqummiunneqartassapput, avataaniillu takussallugit pisariaqartinneqarpata taamaaliornissaq siulersuisuunerit akuerigallartassavaat.

§ 12 Isumaqatigiinniartarnerit.

Namminersornerullutik Oqartussanut allanullu isumaqatigiinniartanerit:

a.   Ataatsimeersuarnermi Nakkutilliisoqarfiullu ukiumoortumik naapinneranni pisortanut suliffeqarfinnullu allanut isumaqatigiinniarnissani anguniakkat pingaartillugit siunnersuutigineqartussat aalajangersarneqartassapput.

b.   Ulluinnarni aqutsisut isumaqatigiinninniarnerit ingerlattassavaat, piareersarnerillu siulersuisuunernit suliarineqartassapput. Pisariaqartitsineq tun­ngavigalugu soqutigisaqaqatigiinnit assigiinngitsunit sinniisut piareersarnerni isumaqatigiinniarnernilu peqataatitaqarsinnaapput. Tamatuma saniatigut ulluinnarni aqutsisut immikkut ilisimasalinnik S.I.K.-milu atorfilinnik siunnersorteqarlutillu ikiortiserinnissinnaapput.

c.   Pisortanut isumaqatigiissuteqareernerup naammassereernerisigut ulluinnarni aqutsisut sineriammi agguarlutik nassuiaajartortassapput, pisariaqarpat atorfilinnik peqateqarlutik.

d.   Namminersornerullutik Oqartussanut allanullu isumaqatigiissutit atuukkunnaarfissaat kingusinnerpaamik qaammatinik 4-nik sioqqullugu immik­koortortaqarfiit soqutigisaqaqatigiiffiillu siunnersuutissaminnik S.I.K.-mut nassiussisinnaapput.

Imm. 2. Nuna tamakkerlugu suliffeqarfittut taaneqarsinnaasunut isumaqatigiinniartarnerit:

a.   Ulluinnarni aqutsisut – pisariaqartinneqarpallu siulersuisuunernut ilaa­sor­tat peqatigalugit – nuna tamakkerlugu suliffeqarfinnut isumaqatiginninniarnerit sapinngisamik Namminersornerullutik Oqartussat isumaqatigiissutigineqarsimasut tunngavigikannerlugit ingerlallugillu aquttassavaat. Isumaqatiginninniarnerni taamaattuni ulluinnarni aqutsisut arlaat pinngitsoorani peqataasassaaq.

b.   Ulluinnarni aqutsisut pisariaqartitsinertik tunngavigalugu piareersarnermi isumaqatigiinninniarnernilu siunnersortissaminnik toqqaasarsinnaapput.

Imm. 3. Illoqarfigisami suliffeqarfinnut isumaqatiginninniartarnerit:

a.   Ulluinnarni aqutsisut pisinnaatitsisinnaapput suliffeqarfinnut – imm. 1-imi 2-milu pineqanngitsunut - isumaqatiginninniarnissani piareersaasussanik ingerlatitsisussanillu toqqaanissamut.

b.   Taama akuersissuteqartoqarsimappat isumaqatigiissutissat atsiortinnagit ulluinnarni aqutsisunut akuerisassanngorlugit saqqummiunneqassapput, ulluinnarnilu aqutsisut allannguutaasinnaasutut piumasaqaataat tunngavigalugit isumaqatigiinninniarnerit inaarsarneqartassallutik.

c.   Isumaqatigiittoqarsinnaatinnagu ulluinnarni aqutsisut pisussaapput nam­minneq qanoq iliuuseqarnermikkut isumaqatigiinninniarnerit piaarnerpaa­mik naamassineqarnissaat anguniassallugu.

Imm. 4. 

a.   Isumaqatiginninniarnerni imm. 1-imi, 2-mi 3-milu taaneqartuni sulinermik unititsinerit suliumajunnaarnerillu aatsaat pisinnaapput siulersuisuunerit akuersinerisigut aalajangiinerisigullu.

b.   Sulinermik unititsinermi akissarsiassanik annaasaqaatisiassat S.I.K.-p nammaqataaffigilersinnaavai ulluinnarni aqutsisut taamaaliornissamut a­ku­ersereersimappata.

Imm. 5. Siulersuisuunerit akuersinerisigut annaasaqaatisiassat imm. 4 b-mi taaneqartut S.I.K.-p suliumajunnaarnissamut aningaasaateqarfianit § 11, imm. 6-imi taaneqartumik isumagineqarsinnaapput.

Imm. 6. Isumaqatigiinniarnerit suulluunniit naammassilernerini immikkoortortaqarfiit siulersuisuisa akuersinissaat tusarniarneqartassaaq.

§ 13 Inatsisinik allannguineq.

SIK-p inatsisai allanngortinneqarsinnaapput SIK-p ataatsimeersuarnerani.

Imm. 2. Allannguutissatut siunnersuutit allaganngorlugit kattuffimmut § 6, imm. 3 naapertorlugu piffissaliunneqartut malillugit nassiunneqarsimassapput.

§ 14. Kattuffiup atorunnaarsinneqarnera.

SIK atorunnaarsinneqarsinnaavoq, atorunnaarsitsinissaq siunertaralugu immikkut ittumik ataatsimeersuartitsinermi, ileqquusumik ataatsimeersuarnermi taaseqataasinnaallutik peqataasut ¾-iisa piumasaqarnerat malillugu.

Imm. 2. SIK-p atorunnaarsinneqarnissaa § 14, imm. 1. naapertorlugu immikkut ittumik ataatsimeersuarnermi aalajangiunneqassagaluarpat kattuffiup naliliutai sumut atorneqassanersut ataatsimeersuaqataasut ikinnerpaamik ¾-iisa isumaqataaffigisaannut atorneqassapput.