Sulisut sinniisaannik pikkorissaanerit immikkoortut marlunngorlugit neqeroorutaapput: Immikkortoq 1 tunngaviusumik ilisimasassanik tamalaanik pikkorissarfiusoq "sulisut sinniisaasa akisussaaffii pisussaaffiilu" qitiutillugit, aamma Immikkoortoq 2 ingerlaqqiffiusoq sulisoqarnermi inatsisit isumaqatigiinngissutinillu aaqqiiniartarneq sammillugit.
 

IMM. 1 - pikkorissarnermi sammisassat:

Sammisani qitiusut: Sulisut sinniisaasa akisussaaffii pisussaaffiilu.
Pikkorissarnerup siunertai:

• Sulisut sinniisaasa SIK-llu suleqatigiinnerisa nukittorsarneqarnissaat.
• Sulisunut sinniisussattut qinigaarlaat suliassaannut nutaanut piukkunnarsarneqarnissaat.
• Sulisut sinniisaasa suliaqarnerisigut ilaasortat ilaasortaanngitsullu SIK-mut tunngasunik ilisimasaqarnerulernissaat.
• Sulisut sinniisaat ilaasortassassarsiortarnermi ilaasortaareersullu ataavartumik ilaasortaasarnissaannut sunniuteqaqataanerulernissaat.

Pikkorissaanerup kingorna peqataasut makkuninnga ilisimasaqalissapput:

• SIK-p inuiaqatigiinni inissisimanera
• SIK-p kattuffittut katitigaanera
• SIK-p aningaasaateqarfii
• Sinniisutut qanoq inissisimanertik ilisimallualissavaat
• Sinniisutut akisussaaffiit pisinnaatitaaffiillu ilisimalissavaat
• Ilaasortassarsiornissami sakkugineqarsinnaasut ilisimalissavaat
• Suliffeqarfimmi ajornartorsiortoqartillugu qanoq iliuuseqarsinnaaneq ajornartorsiutillu aaqqiivigineqarsinnaanerinik misilittaassapput
• Tapersersortitut inissisimanissaq ilisimalissavaat
• SIK-mi isumaqatigiissutit assigiinngitsut ilisimalissavaat
• Sulisut sinniisaattut sulinerminni ilisimasassat assigiinngitsut pingaaruteqartut ilisimalissavaat.

Peqataasussat: Sulisut sinniisaattut qinigaarlaat.

Pikkorissaaneq sioqqullugu iiisimasaqarfigeriigassanik piumasaqaateqanngilaq.

Pikkorissaariaaseq: Saqqummiinerit, eqqartuinerit, suleqatigiikkaarluni suliaqarnerit, piviusut aallaavigalugit sungiusarnerit / takutitsinerit .

Pikkorissaasut: SIK-mi siunnersortit aamma Nukaraq Eugenius (Eugenius Consult).

IMM. 2 - pikkorissarnermi sammisassat:

Sammisani qitiusut: Sulisoqarnermi inatsisit isumaqatigiinngissutinillu aaqqiiniartarneq.
Pikkorissartitsinerup siunertaraa:

• Sulisut sinniisaasa SIK-llu akornanni suleqatigiinnerup nukittorsarnissaa.
• Sulisut sinniisaasa suliassaminnik ingerlatsisinnaasunngorlugit pikkorissarnissaat.
• Sulisut sinniisaasa suliffimminni aporaannernik iluarsiiniaqataasarnissaannut atortussaannik tuniorarnissaat.
• Sulisut sinniisaasa ilaasortassarsiornermi peqataasarnissaanni periusissaannik tuniorarnissaat.

Pikkorissartitsinermi peqataasut ullut sisamat ingerlaneranni ilaatigut makkunannga sammisaqartinneqartassapput:

• Akisussaaffiit pisussaaffiillu.
• Inatsisit sulisut sinniisaattut sulinermi ilisimassallugit pisariaqartut.
• SIK-p isumaqatigiissutai assigiinngitsut.
• SIK-p qullersaqarfianik immikkoortortaqarfinillu suleqartarneq.
• Suliffeqarfimmi aporaattoqartillugu qanoq pissuseqartarnissaq.
• Attaveqaqatigiinnikkut sulisut sinniisaattut qanoq pissuseqartarnissaq.
• SIK-mut ilaasortassarsiornermi qanoq periuseqartarnissaq.

Peqataasussat: Pikkorissartitsinermut peqataasinnaapput sulisut sinniisaat imm. 1-imi naammassinnissimasut.

Pikkorissartitsinerit ilusaat: Saqqummiinerit, suleqatigiikkuutaarnerit, sungiusarnerit, oqallinnerit pisuusaartitsinerillu.

Pikkorissaasussat: SIK-mi siunnersortit, immikkut ilisimasallit avataaneersut aamma Nukaraq Eugenius (Eugenius Consult).

Pisariaqartitsineq periarfissallu naapertorlugit SIP-t siulersuisui attaveqaatillu pikkorissartinneqarsinnaapput. Pikkorissarnerit taamaattut makkuninnga sammisaqarfiugajupput:

Pikkorissarnerup siunertarai:

• Peqatigiiffimmi siulersuisut suleqatigiinnerat nukittorsassallugu immikkoortortaqarfiup ulluinnarni aqunneqarneranut nukittorsaataasumittaaq.
• Ilaasortanut attaveqarneq sullissinerlu nukittorsassallugit.
• Sulisut sinniisaannik pilersitsisarneq, attaveqarneq sullissinerlu ineriartortissallugit nukittorsassallugillu.
• Sulisitsisunik attaveqarneq suleqatiginninnerlu nukittorsassallugit.
• Kattuffimmut attaveqarneq tassanilu suleqataaneq nukittorsassallugit.

Pikkorissarnermi ullunik marlunnik sivisussuseqarajuttumi isumaqatigiissuserineq ilaajuaannarpoq – tassa isumaqatigiissutit qanoq paasineqassanersut, sunik imaqarnersut qanorlu atorneqartarnersut. Aamma ilaavoq sulisut sinniisaat pillugit isumaqatigiissut.

Inatsisit attuumassuteqartut paasissutissiissutigineqartarput – soorlu feeriamut inatsit, sullivinni avatangiisit pillugit inatsit, suliffeqarnermut inatsit, pisortani suliassat suliarineqartar­nerannut inatsit aamma naartunermi erninermilu sulinngiffeqartarnermut inatsit.

Peqatigiiffiup nammineq malittarisassai aallaavigalugit siulersuisut ulluinnarnilu aqutsisut (taamaattoqaraangat) suleriaasii minnerunngitsumillu SIK-p inatsisai (malittarisassai) sammineqartarput.

SIK-p ataatsimeersuarnerani kingullermi aalajangikkat siulersuisuunerillu anguniagassatut siunniussaat, kiisalu SIK-p aningaasaateqarfiisa suuneri qanorlu atorneqarneri, paasissutissiissutigineqartarput.

Pikkorissarnerup ingerlanerani suliassiissutinik misileraasoqartarpoq ulluinnarni pisartut suliassanngortartullu piviusut aallavigalugit, soorlu soraarsitsinerit, akissarsiat pillugit suliassiissutit mianersoqqussutinillu tunniussinerit. Naggataatigullu suliakkiisoqartarpoq anguniakkanik takorluukkanillu qanoq timitalersuillunilu piviusunngortitsiniarsinnaanermut tunngasumik, kia suut suliarissanerai il.il.