X
GO
da-DKkl-GL
SIK
Ilaasortassarsiupallanneq iluatsilluartoq

19. februaari 2020: Ilulissani sulisut sinniisaat pisiniarfiit pingasut paarliinut inissillutik ilaasortassarsioramik akunnerup aappaata affaata ingerlanerani 15-inik nutaanik ilaasortassarsipput.

Sulisut sinniisaat Ilulissani SIK-p immikkoortortaqarfianut atasut qaammammi matumani siusinnerusukkut pikkorissartut siunniussaqarsimapput upernaaru maaji naatinnagu 15-inik nutaanik ilaasortassarsereersimassallutik. Sunaaffali taama sivisutigisariaqanngitsoq – tassami pingasunngorner­mi februaarip 19-iani nal. ak. ataatsip minutsilllu 45-t ingerlanerinnaanni Brugsenip, Pisiffiup aamma Super 1-ip paarliini saneqquttunik ilaasortassarsiornermi anguniakkat anguneqariikatapput!

Ilaasortanngorniartut immersugassaannik, refleksinik, balloninik, sukkulaanik naqitaaqqanillu paasissutissanik nassarlutik sulisut sinniisaat qiimallutik inussiarnerlutillu pingasukkaarlutik pisiniarfinni ornigarneqarnerpaasartuni iliuuseqarput – soorunami pisiniarfinni pisortaasut akuersiseq­qaar­lugit.

Angusat tassaapput ilaasortanngortitsinerit 15-it, ilaasortaq ataaseq paasissutissanik nutarterilluni soqutiginnittullu arlallit immersugassanik tigusillutik. Iliuuseqarneq tamanna pivoq sulisut sinnii­saa­sa ulloq taanna ataatsimiinnerat pilersaarutaareersoq iluatsillugu. Tassa qaammatip naanerani pisiniarfiit inugasaarfiginerusartagaanni pinngilaq. Taamaakkaluartoq angusat iluarisimaarneqarput.

”Iluatsilluartutut misigaarput taamaalilluta allannguilaarluta sulisut sinniisaat pikkorissarsimasut tapersersoratsigit aammalu kattuffiup aqqa sulisartullu peqatigiiffiat inunnut siammarteratsigit,” Ilulissani SIP-p siulittaasua Else Jonna Villadsen taama unnersiorpoq.

Tamatuma kinguninnguatigut Ilulissani SIK-mut ilaasortat ilaat Upernavimmut suliartorpoq. Ilulissanilu pisimasut nuannersut isumassarsissutigilluarlugit ilaasortassarsiorneq nammineerluni Upernavimmi nangippaa, ullullu ilaanni nalunaarpoq marlunnik ilaasortanngortitaqarsimalluni allanillu aamma immersuisoqartoq.

 

Assilissat: Ilulissani pisiniarfiit pingasut paarliini paasisitsiniaallunilu ilaasortassarsiupallanneq aaqqissuunneqarpoq holdit arlariinngorlugit tamarmik sulisut sinniisaannik pingasunik inuttaqartut. Siulliit minutsini 45-ni tulliilu aamma minutsini 45-ni ”vagteqarput”.